– Det er alvorleg at dødstalet har gått så mykje opp. Folk må køyre forsiktig og skjerpe seg bak rattet, seier justisminister Emilie Enger Mehl (Sp) til NTB.
Så langt i år har 63 personar omkomme i trafikken, dobbelt så mange som i same periode i fjor.
Då Utrykkingspolitiet (UP) gjennomførte trafikkontroll på E18 ved Bentsrudkrysset i Holmestrand, var Mehl vitne til at heile 19 førarar fekk førelegg for å ha køyrt for fort.
– Politiet gjer ein enormt viktig jobb med å vere ute på vegane, vere synlege, ha kontrollar og sørgje for at folk køyrer mest mogleg trygt. Dersom ein er ukonsentrert og uforsiktig, set ein andre i fare. Eg håpar at vi alle kan vere med på å bidra til at det blir tryggast mogleg å ferdast på norske vegar, seier Mehl.
(©NPK)