I tillegg til dei drepne, er rundt 30 personar såra i skyteepisoden på Karlsuniversitetet i den tsjekkiske hovudstaden. Gjerningsmannen er blant dei femten som er drepne.
UiB har ifølgje Bergens Tidende vore i kontakt med alle dei fire utvekslingsstudentane sine, og ingen av dei skal vere ramma av skytinga.
Ifølgje TV 2 har også Universitetet i Oslo tre utvekslingsstudentar ved Karlsuniversitetet i Praha. Alle desse er gjort greie for og har det bra.
Studentorganisasjonen ANSA for norske studentar i utlandet har i underkant av 40 medlemmer som er tilknytte Karlsuniversitetet, fortel president Anna Handal Hellesnes til TV 2.
Ho kan ikkje gi eit nøyaktig tal på kor mange av dei som er i byen no.
– Vi er i kontakt med medlemmene våre med informasjon for korleis komme i kontakt med Utanriksdepartementet, Sjømannskyrkja og tilby velferdstilbod, som sosialrettleiar og psykolog, seier Hellesnes.
