Politiet kom umeldt til asylmottaket i Rogaland, midt på natta. Kvinna blei så frakta til Politiets utlendingsinternat på Trandum. Det ligg like ved flyplassen på Gardermoen.
Etter snart 25 år i Norge skal ho bli deportert til Etiopia straks papira som vil sleppe henne inn i heimlandet er i orden. Kvinna skal ikkje ha gyldig pass.
Ho kom til landet hausten 1999, frå Etiopia, søkte asyl og fekk avslag.
I snart 25 år er ho blitt skyssa frå mottak til mottak, og har fått endeleg avslag på asylsøknaden.
I Norge har ho barn og barnebarn. I Etiopia har ho ingen familie att.
No må lovgjevarane reagere. Denne saka kan ingen vere stolte av
— Jon Ole Martinsen, Noas
Kvinna oppfylte hovudkrava i eingongsløysinga Solberg-regjeringa fekk på plass:
«Som innen 1. oktober 2021 vil ha oppholdt seg i Norge i over 16 år etter at asylsøknaden ble innlevert, og som vil ha en samlet alder og oppholdstid på minst 65 år.»
Men det var forhold ved asylsøknaden som hindra henne å få glede av eingongsløysinga: Opphald i Norge.
Kvinna er i dag 65 år. Og svært sjuk. Ho må ta ei større mengde legemiddel dagleg.
Noas: Inhuman og streng politikk
I Norsk organisasjon for asylsøkere (Noas) er talsmann Noas Jon Ole Martinsen både opprørt og oppgitt:
– Saka til den etiopiske kvinna er eit dessverre eit grelt døme på kor inhuman og streng regelverket og politikken på dette området er i dag.
– Avgjerda om å pågripe og tvangssende henne til Etiopia er grovt urettvis. Her er så mange sterke menneskelege omsyn som talar for at ho skulle hatt opphald i Norge, seier Martinsen til Vårt Land.
Han forklarar at utlendingsforvaltninga kunne gitt kvinna opphald, utan at det hadde skapt presedens.
Martinsen sender difor ei melding til lovgjevarane på Stortinget:
– No må lovgjevarane reagere. Denne saka kan ingen vere stolte av.
Justisminister Mehl handhevar streng praksis
Justisminister Emilie Mehl (Sp) har i år fått fleire skriftlege spørsmål om tvangsutsendingar av etiopiarar, etter at politiet i februar byrja å førebu slike i stor målestokk.
Mehl har nekta å gripe inn. I mai svarte ho, i eit brev til Stortinget:
«Det er ikke aktuelt for denne regjeringen å stoppe utsendelsen av etiopiere fra Norge eller for øvrig innføre en engangsløsning som vil gi etiopiske asylsøkere rett til oppholdstillatelse etter langvarig ulovlig opphold i landet.»
Fryktar for livet hennar
Irene Ege har kjent den etiopiske kvinna i kring 15 år. Ho er ein ven og hjelpar i kvardagen.
Ege reagerer sterkt på at kvinna no skal bli tvangssendt til Etiopia:
– Ho har ingen familie der, ho er svært sjuk, helsa er veik. Faktisk er eg redd for at ho kan døy om ho blir deportert til Etiopia, for kven skal ta i mot henne der, skal norsk politi berre dumpe henne på flyplassen? spør Ege.
Tidlegare i år har politiet følgt etiopiarar som er blitt tvangssendt frå Norge til Etiopia. Då har politiet skilt lag med dei tvangssendte på flyplassen i Addis Abeba.
Snakka om livet i Norge
I 2017 kom rapporten «Hvem skal holde meg i hånden når jeg dør? Han var laga av RIA Kvinnegruppe – der RIA står for organisasjonen Rettferdighet i asylpolitikken
Ifølgje ein tal frå Utlendingsdirektoratet budde det i 2017 62 einslege kvinner over 50 år med endeleg asylavslag på asylmottak i Norge.
Den etiopiske kvinna som politiet no skal sende ut av landet var ei av informantane i RIAs rapport. Her fortel ho om år med sjukdom i Norge.
