Julian-Bert Schäfer er nemleg medlem av og politisk aktiv i Alternative für Deutschland (AfD).
Partiet ligg eit godt stykke ute på høgresida i tysk politikk – og det ligg svært godt an, målt i oppslutning før valet på ny forbundsdag i Tyskland 23. februar.
Opp mot kvar fjerde veljar seier dei støttar alternativt.
Samstundes har partiets politikk ført hundretusental ut i gatene i byar over heile Tyskland i januar og februar.
«Me er brannmuren», ropar dei. Mot AfD.
Fekk støtte frå partileiaren
Då Julian-Bert Schäfer i fjor blei vist døra i den katolske kyrkjelyden St. Franziskus von Assisi i byen Hamm, small han tilbake:
– Kyrkja forkynner og ber dagleg for einskap og fred her og i heile verda. Kvifor praktiserer ho ikkje dette, men ekskluderer i staden mangeårige, lojale tenarar og ærekrenkjar dei offentleg? skreiv han på eigen Instagram-side.
Partileiar Alice Weidel i AfD følgde opp:
– Den katolske kyrkja heng alltid i kappekanten til regjeringane. Velgjerd stoppar veldig raskt når du tilhøyrer feil parti.
Vil sende innvandrarar til heimland
Alternativ for Tyskland er eit høgrepopulistisk og nasjonalkonservativt parti med sterke høgreradikale innslag, som alternerer mellom å vere Tysklands nest største og tredje største parti.
Partiet vil stengje landets grenser og sende innvandrarar ut av landet i stor skala, såkalla remigrasjon. AfD blir også skulda for å tolerere antisemittisme og anna rasisme.
Tysk politi opna i januar etterforsking, for hatefull ytring, etter at AfD delte ut valhefte utforma som einvegsbillettar ut av landet, til innvandrarar.
Valkampstuntet blir samanlikna med einvegsbillattene til Jerusalem som nazistane delte ut på 1930-talet.
Sidan 2021 har AfD vorer overvaka av etterretningstenesta BfV, mistenkt for høgreekstremisme.
---
Kyrkjer i Tyskland
- Tyskland har om lag 85 millionar innbyggjarar.
- 60 prosent identifiserer seg som kristne.
- Av desse er kring 30 prosent katolikkar og om lag 30 prosent protestantar.
---
Tilsette kan miste jobben
Derfor har Den katolske kyrkja i Tyskland svartelista partiet.
Den lokale kyrkjelyden i Hamm tok alle frivillige oppgåver frå Julian-Bert Schäfer. Katolikken var både altargut, tekstlesar og organist.
Bispekonferansen har sendt ut eit hyrdebrev som slår fast at rasemessig nasjonalisme og kristendom er uforeinleg.
Tysklands katolske biskopar følgde så opp med eit sett kriterium for avskilting av tilhengjarar av «ekstremistiske» parti, som anten er tilsette eller har tillitsverv og frivillige oppgåver.
Valde ikkje det soknepresten ønskte
Julian-Bert Schäfer var svært aktiv i St. Franziskus von Assisi. I juli i fjor gav sokneprest Ralf Dunker han eit ultimatum:
Som aktiv i AfD, med verv i lokallaget, kan du ikkje ha frivillige oppgåver i kyrkjelyden. Du må velje.
Julian-Bert Schäfer valde Alternative für Deutschland – og fekk solid applaus frå Hamm AfD.
«Kyrkjeskandale» lydde meldinga lokallaget sende ut etter utestenginga av Schäfer. Det slo fast at avgjerda var både grunnlovsstridig og diskriminerande.
Sjølv melde Schäfer at «ekskluderinga er ikkje berre eit brot på mine rettar som truande, men også eit svik mot prinsippa om toleranse og respekt for det kyrkja forkynner».
Fekk valet på nytt
Kyrkjelyden i Hamm soknar til Paderborn erkebispedømme. Pressetalsmann Thomas Throenle snakkar på vegner av sokneprest Ralf Dunker.
– Kva er status i dag?
– Presten til St. Franziskus i Hamm tilbaud herr Schäfer å ta opp att sitt frivillige arbeid i soknet, som altargut, tekstlesar og organist ved gravferder, dersom han tok avstand frå politiske verv. Så vidt me veit har ikkje herr Schäfer gjort det, opplyser Throenle til Vårt Land.
Erkebispedømmet stiller seg bak sokneprestens ultimatum.
– Han handla på grunnlag av bispekonferansen klare haldning, forklarar talsmannen.
På sosiale medium driv Schäfer aktiv valkamp. For AfD, poserande saman med partileiar Alice Weidel.
Biskopar sende ut veljarråd
I hyrdebrevet, som gjekk ut i februar i fjor, står dei katolske biskopane samla om ein bodskap:
«Me seier det tydeleg: Rasemessig nasjonalisme er uforeinleg med det kristne bildet av Gud og menneske. Høgreekstreme parti og dei som florerer i utkanten av denne ideologien kan difor ikkje vere ein stad for politisk aktivitet for kristne og kan ikkje bli røysta på.»
Biskopane rettar ei bøn til veljarane: «Lat oss alle yte motstand når menneskeverd og menneskerettar er truga.»
Åtvaringa er høgst uvanleg. For i 25 år har dei katolske biskopane vist svært liten vilje til å gripe inn i val – ved å vurdere politiske parti.
Og: Den katolske kyrkja er ein av Tysklands største arbeidsgjevarar.
Kom med med retningsliner for ekskludering
Hyrdebrevet har fått konsekvensar for fleire enn Julian-Bert Schäfer.
Trier bispedømme fjerna Christoph Schaufert som medlem i soknerådet i kyrkjelyden St. Marien. Grunngjeving: Han er AfD-politikar og er folkevalt i delstatsforsamlinga i Saarland.
Magdeburg bispedømme har endra retningslinene for val til sokneråd og andre kyrkjelege komitear. Dei som kjem med offentlege fråsegner mot menneskeverdet, spesielt etnisk-nasjonalistiske, rasistiske og antisemittiske kan bli ekskluderte.
Dei som tek på seg verv eller oppgåver for parti eller organisasjonar som er klassifiserte som «ekstremistiske» av bispedømmet kan bli utestengde.
---
AfD
- Alternative für Deutschland er eit ytre høgreparti.
- Skipa i 2013.
- Alice Weidel og Tino Chrupalla er partileiarar, Weidel er statsministerkandidat i valet 23. februar.
- AfD har sidan 2021 vore overvaka av Tysklands etterretningsteneste, mistenkt for høgreekstremisme.
- AfD gjer det bra på meiningsmålingane, men ingen av dei andre partia i Forbundsdagen ønskjer å samarbeide med dei.
- Likevel prøvde konservative CDU/CSU i januar å alliere seg med AfD for å få støtte til eit forslag om å bremse innvandringa.
- CDU-leiar Friedrich Merz, som er storfavoritt til å bli ny statsminister, utelukkar samarbeid i ei eventuell ny regjering.
---
