34 år gamle Panya Kamrap, som nyleg hadde fått sparken som politimann, skaut først mot barnehagen frå bilen sin, før han trengde seg inn i bygningen og drap med kniv.
Etter massakren køyrde han heim og drap kona, sonen og seg sjølv, ifølgje politiet.
Tilbake i barnehagen låg 24 drepne born, dei fleste av dei i to-treårsalderen, og tolv vaksne.
Tragedien sjokkerte heile Thailand, og fredag besøkjer kong Maha Vajiralongkorn og statsminister Prayut Chan-o-cha dei etterlatne i landsbyen Uthai Sawan, godt og vel 500 kilometer nordaust for Bangkok.
Utanfor barnehagen venta hjarteknuste foreldre, sysken og andre slektningar av dei drepne, og mange av dei la kvite roser ned på trappa til bygningen.
Misbrukar
Ifølgje lokale innbyggjarar var gjerningsmannen godt kjent og likt i området, men det var inga hemmelegheit at han misbrukte metamfetamin.
Ifølgje politiet skulle han møte i retten fredag, tiltalt i ei narkotikasak som tidlegare i år kosta han jobben.
Den verste masseskytinga i Thailand før hendinga torsdag, fann stad i 2020. Då opna ein soldat eld i eit kjøpesenter i Nakhon Ratchasima nordaust i landet. 29 menneske vart drepne før gjerningsmannen sjølv vart drepen av tryggingsstyrkar.
